རྒྱལ་ཡོངས་ཀྱི་མཐོ་རིམ་སློབ་གྲྭའི་བོད་སྐད་ཡིག་རྩོམ་རིག་ཆེད་ལས་སློབ་ཁྲིད་ཀྱི་ཞིབ་བསྡུར་ཚོགས་འདུ་སྐབས་བདུན་པ་ལྷོ་ནུབ་མི་རིགས་སློབ་གྲྭ་ཆེན་མོ་ནས་ཚོགས་པ།

 ཟླ་འདིའི་ཚེས་༢༡ཉིན།  རྒྱལ་ཡོངས་ཀྱི་མཐོ་རིམ་སློབ་གྲྭའི་བོད་སྐད་ཡིག་རྩོམ་རིག་ཆེད་ལས་སློབ་ཁྲིད་ཀྱི་ཞིབ་བསྡུར་ཚོགས་འདུ་སྐབས་བདུན་པ་དེ་ལྷོ་ནུབ་མི་རིགས་སློབ་གྲྭ་ཆེན་མོ་ནས་ཚོགས།   གསར་འགོད་པས་རྒྱུས་ལོན་བྱས་པ་ལྟར་ན།   ཉིན་གཉིས་ཀྱི་ཞིབ་བསྡུར་ཚོགས་འདུའི་སྟེང་།   རྒྱལ་ཡོངས་ཀྱི་མཐོ་རིམ་སློབ་གྲྭ་སོ་སོ་ནས་ཡོང་བའི་ཆེད་མཁས་པ་དང་འཐུས་མི་རྣམས་ཀྱིས་མིག་སྔར་མཐོ་རིམ་སློབ་གྲྭའི་བོད་སྐད་ཡིག་རྩོམ་རིག་ཆེད་ལས་ཀྱི་རིག་ཚན་འཛུགས་སྐྲུན་གྱི་ད་ལྟའི་གནས་ཚུལ་དང་འཕེལ་རྒྱས་ཞིབ་འཇུག་སོགས་གཙོ་བོར་བཟུང་སྟེ་གྲོས་བསྡུར་བྱས།   དེའི་ནང་ཀྲུང་དབྱང་མི་རིགས་སློབ་གྲྭ་ཆེན་མོའི་བོད་རིག་པ་ཞིབ་འཇུག་སློབ་གླིང་གི་སློབ་དཔོན་ཆེན་མོ་ཚེ་རིང་ཐར་དང་།  བོད་ལྗོངས་སློབ་གྲྭ་ཆེན་མོའི་རྩོམ་རིག་སློབ་གླིང་གི་སློབ་དཔོན་ཆེན་མོ་བསམ་གཏན་སོགས་ཆེད་མཁས་པ་བཅུ་བདུན་གྱིས་ཆེད་དམིགས་གཏམ་བཤད་གནང་།  ཞིབ་བསྡུར་ཚོགས་འདུའི་སྐབས་སུ།  གྲོས་ཞུགས་མི་སྣ་རྣམས་ཀྱིས་ལྷོ་ནུབ་མི་རིགས་སློབ་གྲྭ་ཆེན་མོའི་བོད་ཡིག་ཡིག་ཆ་ལྟེ་གནས་ལ་ལྟ་སྐོར་བྱས་པ་དང་།    བོད་སྐད་ཡིག་སློབ་གསོའི་གནས་ཚུལ་སོགས་ལ་ལྟ་སྦྱོང་བྱས།  ཚོགས་འདུ་གྲོལ་རྗེས་རྒྱལ་ཡོངས་ཀྱི་མཐོ་རིམ་སློབ་གྲྭའི་བོད་སྐད་ཡིག་རྩོམ་རིག་ཆེད་ལས་སློབ་ཁྲིད་ཀྱི་ཞིབ་བསྡུར་ཚོགས་འདུ་སྐབས་བདུན་པའི་ཟིན་བྲིས་གནད་བསྡུས་སྤེལ་བར་མ་ཟད།    རྒྱལ་ཡོངས་ཀྱི་མཐོ་རིམ་སློབ་གྲྭའི་བོད་སྐད་ཡིག་རྩོམ་རིག་ཆེད་ལས་སློབ་ཁྲིད་ཀྱི་ཞིབ་བསྡུར་གྲོས་ཚོགས་སྐབས་བརྒྱད་པ་གཙོ་བསྒྲུབ་བྱེད་པའི་ལས་ཁུངས་དང་དུས་ཚོད།  ས་གནས་སོགས་གཏན་འཁེལ་བྱས།